E hëna ka nisur e mbrapsht, 3 të vrarë është bilanci nga vrasjet në Shkodër e Vlorë.
Një sherr mes fqinjësh në Vlorë ka përfunduar me vrasjen e një 57-vjeçari. Ngjarja e rëndë ndodhi në fshatin Ploç të Vlorës, rreth orës 20:30 të së hënës.
Nga hetimet e para rezulton se mes autorit të identifikuar si Mystehak Selimaj, 54 vjeç, dhe viktimës Ilia Kadare, 57 vjeç, ka ndodhur një konflikt, i cili kishte si motiv problemet për një ndarje gardhesh mes familjeve.
Mbrëmjen e djeshme, dy fqinjët janë përplasur sërish, duke u ballafaquar fillimisht me fjalë e më pas fizikisht. Njëri prej tyre, më i riu, ka nxjerrë një thikë, me të cilën ka qëlluar disa herë në bark fqinjin e tij.
Ky i fundit është transportuar me urgjencë drejt spitalit rajonal të Vlorës, por nuk ka mundur të mbijetojë. Sipas Policisë, ai ndërroi jetë pas disa minutash në spitalin e Vlorës. Policia, e njoftuar për krimin, shkoi me shpejtësi në vendin e ngjarjes, ku konstatoi se mes dy fqinjëve kishte ndodhur konflikti për motive të dobëta.
“Është bërë identifikimi i shpejtë i autorit të krimit, i cili u gjet në banesë, bashkë me armën. U bë arrestimi në flagrancë i Mystehak Selimajt. Vijojnë hetimet procedurale për zbardhjen e plotë të ngjarjes”, pohoi Policia e Vlorës.
