Ambasadori amerikan Donald Lu ka deklaruar sot se koha e gjyqtarëve dhe prokurorëve të korruptuar ka përfunduar me miratimin e reformës në drejtësi.
“Koha e gjykatësve dhe prokurorëve të korruptuar ka përfunduar, është brezi i ri ai që duhet të lërë gjurmë. Koha e gjykatësve dhe prokurorëve të korruptuar ka përfunduar”, tha ambasadori amerikan në ceremoninë e diplomimit të magjistratëve të rinj.
Lu ka dhënë edhe disa mesazhe për gjyqtarët e rinj.
“Sot është dita juaj. Brezi ri i gjyqtarëve duhet të lerë gjurmë. Shfrytëzoni reformën që të tregoni se njerëzit do trajtohen me respekt. Tregoni se mund të bëni drejtësi pa para, pa ndikim politik dhe frikë nga kriminelë të rrezikshëm.
Do ngjisni mal të lartë por do ia dilni. Ta kujtojmë këtë ditë si të parën e brezit të profesionistëve në Shqipëri”, tha Lu.
