Kryetari i PDIU-së, Shpëtim Idrizi ka përshëndetur sot nga Parlamenti, njohjen e çështjes Çame që u bë nga Brukseli.
“Një njeri jo i vendit tim më dha një përgjigje që për 72 vite duhet të ma jepnin politikanë të vendit tim”, tha Idrizi, duke u kujtuar deputetëve shqiptarë se, disa prej tyre e tërhoqën zvarrë kauzën e Çamëve.
“Sot është një ditë e rëndësishme sepse pas kaq vitesh përpjekjesh, mundimesh, genocide ne zemër të Europës atje ku ne dëshirojmë të bëhemi pjesë u mor parasysh. Sot më vjen për mbarë t’u them se jam shqiptar i Çamërisë, por jam europian. Një njeri jo i vendit tim më dha një përgjigje që për 72 vite duhet të ma jepnin politikanë të vendit tim. Ne shqiptarët kemi pasur më shumë frikë për çështjen Çame, ne sikur kemi dashur ta harronim, një pjesë prej jush e tërhoqën zvarrë.
Sot të gjithë në këtë sallë duhet të jemi krenarë. Të gjithë jemi çam sepse të gjithë jemi shqiptar. Çështja çame ka qenë shpesh burim i teorive konspirative dhe na është shprehur si mollë sherri, sot ju përgjigjëm gojëve të liga se çështja came ekziston sepse sot e tha edhe komisioneri Hahn”, tha Idrizi.
Sakaq si shtoi çështja çame duhet të zgjidhet urtësisht nga shqiptarët dhe grekët.
“Po e bëj të qartë që çështja çame duhet të zgjidhet urtësisht nga shqiptarët dhe grekët. Kemi shembuj të mëdhenj të historisë paqësore mes grekëve dhe shqiptareve. Nuk mund të lejojmë të na nëpërkëmbin vetëm sepse i përkasim një krahine shqiptare edhe pse për vite na kanë ndaluar të shkojmë. Vetëm 4 orë larg Tiranës janë shtëpitë tona, ne s’kemi ndërmend të trembim njeri”, tha Idrizi.
Në fund, kreu i PDIU-së shtoi se “është koha që bashkë me politikën t’i futen punës historianët, studiuesit dhe të përhapin këtë çështje. Është koha e lobimeve të mëdha në mbarë botë. Mos pyesni sot se nga e keni origjinën krahinore, jam i bindur që sot, të gjithë e keni prejardhjen nga Çamëria”.
