Kryeministri Edi Rama është në pozitë të vështirë për vendimin e importit të mbetjeve.
Duke parë se replikat e tij në Facebook me qytetarët nuk po pinë ujë, ka ndryshuar strategji duke bërë atë që bën më mirë: përdorimin e mediave.
Kryeministri ka zgjedhur televizion më të madh në vend, Top Channel-in, që të mbrojë importin e mbetjeve.
Para dy ditësh, Top Channel fill pas lajmeve mbi shqetësimin që sjell aprovimi i ligjit të mbetjeve në Shqipëri, kishte si kronikë të zgjeruar një reportazh të titulluar “Mbetjet shpëtojnë ndotjen”.
Ndërsa dje, në faqen në internet, Top-Channel shpallte një sondazh ku votuesve i drejtohet një pyetje: Nëse i duhet besuar deklaratave të Lulzim Bashës për plehrat. Normalisht që shumica e votave ishin kundër Bashës.
Por nuk ndalet me kaq. Sot ka vendosur të transmetojë një intervistë të ish-presidentit Alfred Moisiu.
Ky i fundit një mbështetës i Ramës, ashtu si Sazan Guri, por edhe vetë Rama, ka ndryshuar mendje për importin e mbetjeve.
“Ish-Presidenti i Republikës së Shqipërisë, Alfred Moisiu ka qenë një nga kundërshtarët më të fortë të ligjit të mbetjeve, që nga koha kur ishte në detyrën më të lartë të shtetit. Por sot, ish-presidenti thotë se ka ndryshuar mendim dhe sipas tij, duhet të kemi besim te shteti.
“Unë sigurisht kam qenë dhe jam kundër importit të plehrave, por jo kundër disa mbetjeve të specifikuara dhe me kushte sigurie”, thotë ndër të tjera Alfred Moisiu”, shkruan Top Channel.
Televizioni më i madh kombëtar nuk merret me investigimin e arsyeve se pse gënjeu kryeministri për ligjin e mbetjeve. Por ka nisur me regji të Ramës propagandën se duhet të kemi besim te kjo qeveri.
