Ministri i Drejtësisë Ylli Manjani do t’i kërkojë KLD-së të shkarkojë gjyqtaren e Gjykatës së Durrësit, Joana Qeleshi e cila i njohu të drejtën e pronës familjes Seçuni për 45 mijë metër katrorësh pronë te Gjiri i Lalzit, ku kompania Omnix do ndërtonte resortin turistik.
Vendim ky që duket se u bë shkak për konfliktin që pasoi me rrahjen e biznesmenit të huaj Faadi Mitri.
Në një konferencë për mediat, Manjani bëri publike rezultatet e hetimit administrativ duke thënë se “kemi përgjegjësi të rëndë ligjore që nis nga gjykata e Durrësit. Ajo ka gabuar shumë rëndë proceduarialisht. Kam vendosur të nis procedim disiplinor për shkarkimin e gjyqtares në KLD. Është vendim shumë i rëndë me një pasojë shumë të rëndë. Shkelja e ligjit cënon rëndë figurën e gjyqtarit. Gjykata bëri gabim që injoroi zyrën e kthimit të kompensimit të pronave. Vendimi nuk duhej dhënë nga një gjykatës por nga trupë gjyqësore prej tre gjykatësish”.
Manjani kërkon dhe shkarkimin e drejtuesit të avokaturës së shtetit në Durrës i cili ka qenë nuk ka ankimuar vendimin në gjykatë duke e bërë këtë vendim të hyjë në fuqi.
