Antonio Conte pritet të përjashtojë nga formacioni titullar Gary Cahill dhe Branislav Ivanovic pas paraqitjes zhgënjyese të bëra nga dy lojtarët në ndeshjen kundër Arsenal-it.
Edhe David Luiz rrezikon të ketë të njëjtin fat pas vetëm dy ndeshjesh të luajtura që nga momenti i kthimit te londinezët këtë verë.
Trajneri italiani nuk është aspak i kënaqur me lojën e tre lojtarëve, që katër vite më parë kanë fituar Champions League.
Shpresat e Contes janë te rikthimi i Terryt, që duket se është një siguri për prapavijën e Chelseat, pavarësisht moshës 35-vjeçare. Në të njëjtën kohë pritet edhe riaftësimi i plotë nga dëmtimi i Zouma, për të provuar një dyshe tjetër qendërmbrojtësish për sfidat e radhës.
Skuadra e Antonio Contes e ka shënuar suksesin e fundit pikërisht më 27 gusht ndaj Burnleyt. Pas kësaj date, Chelsea ka humbur dy ndeshje dhe ka barazuar një, gjë që ka ndezur sinjalet e alarmit.
