Kryeministri Edi Rama është rikthyer sërish në Parlament me argumenta shtesë për ligjin i importit të mbetjeve të riciklueshme, duke thënë se mafia punon me qeveritë që riciklojnë armë dhe jo me ato që riciklojnë mbetje.
“Ishte e vërtet dje, është e vërtetë sot dhe do jetë gjithmonë që ka një mafie të plehrave që synon territore pa kontroll dhe bashkëpunon me qeveri që nuk kanë interesat e publikut në qendër të vëmendjes së tyre.
Është e qartë që mafia nuk punon me qeveritë për të ricikluar letër, për të ricikluar karton, për të ricikluar plastik, për të ricikluar metale të lehta që janë në fakt mbetjet e ambalazheve ushqimore. Mafia punon me qeveritë për të ricikluar armë dhe predha”, tha Rama.
Por ndoshta qëllimisht kryeministri shqiptar harron se grupimi mafioz “Kamorra” e ka kthyer biznesin e plehrave në një biznes mjaft fitimprurës për ta. Madje edhe mw fitimprurës se droga. Sipas raporteve të antimafias italiane, shumë kompani të mëdha, për mbetjet radioaktive të fabrikave të tyre i drejtohen pikërisht mafias që të merren me menaxhimin e tyre, për arsye se u kushton më pak kjo rrugë, sesa rruga ligjore
Ndërkohë jo më larg se disa vite më parë, kur në Shqipëri po debatohej për importin e mbetjeve, eksperti i mafias italiane, Roberto Saviano, paralajmëronte Shqipërinë që të bëjë kujdes nga mafiet italiane që duan të transportojnë plehrat. “Mafia italiane po sheh mundësinë për të bërë biznes me shqiptarët për transportin e plehrave. Bëni shumë kujdes”, pati paralajmëruar ai.
