Shoqata e Investitorëve të Huaj në Shqipëri (FIAA) dënon ashpër sulmin e dhunshëm dhe kriminal të ushtruar mbi Administratorin e Grupit OMNIX në Shqipëri, Fadi Mitri.
Në një deklaratë zyrtare për median, FIAA deklaroi sot se kjo ngjarje ka ndodhur në një moment kur Partnerët Ndërkombëtarë si dhe qeveria e Shqipërisë, janë duke punuar intensivisht së bashku për të përmirësuar Klimën e Biznesit me qëllim për të tërhequr investime të huaja, shumë të nevojshme për zhvillimin e vendit dhe për përmirësimin e standardeve të jetesës në Shqipëri.
Shoqata e Investitorëve të Huaj beson se, ky është qartazi një veprim i ndërmarrë nga individë që operojnë jashtë kufijve ligjorë, të cilët në këtë formë vënë në rrezik reputacionin e të gjithë Komunitetit.
Megjithëse, FIAA e supozon se ky është një “rast i izoluar” dhe duke vlerësuar reagimin në kohë të forcave zbatuese të ligjit, i bën thirrje institucioneve shtetërore të marrin masat më të forta të mundshme ndaj këtyre “armiqve të përbashkët”. Në këtë rast, FIAA dëshiron të sjellë në vëmendje rëndësinë e miratimit të Reformës në Drejtësi, e mbështetur në mënyrë efektive nga FIAA që nga fillimi i procesit.
FIAA, si përfaqësuese e bizneseve të huaja që aplikojnë praktikat më të mira dhe standardet më të larta etike, deklaroi se është e gatshme për të bashkëpunuar me të gjithë komponentët e shëndetshëm të shoqërisë civile dhe me institucionet e shtetit për të shmangur që ngjarje të tilla fatkeqe të ndodhin përsëri në të ardhmen.
Dy ditë më parë, përfaqësuesi zyrtar i kompanisë OMNIX, njoftoi se biznesmeni libanez, Fadi Mitri, tërhiqet nga të gjitha investimet në Shqipëri.
Sulmi barbar i datës 10 shtator kundër tij dhe familjes është shkak i këtij largimi, njoftoi kompania në një deklaratë për mediat.
OMNIX Albania kishte nisur të ndërtonte në Gjirin e Lalëzit një resort turistik me vlerë 450 milionë USD.
Ky projekt turistik konsistonte në ndërtimin e një hoteli me 5 yje, 370 dhoma me të gjithë elementet e tjerë të një standardi më të lartë, ambiente për shitje dhe dhënie me qira, park ujor, dyqane, bulevard, bare, restorante, etj.” – thuhet në reagimin zyrtar të OMNIX.
Ky projekt gjigant do të hapte rreth 1200 vende pune deri në vitin 2018, si dhe do t’i jepte Shqipërisë pamjen e një vendi si destinacion turistik numër 1 në Adriatik dhe Ballkan, është shprehur përfaqësuesi zyrtar i kompanisë. /Monitor/
