Në këtë fundshtatori u mbyll sezoni i korrjeve të kanabisit. Zyrtarisht, policia njoftoi se në fushat e Shqipërisë nuk gjen më bimë narkotike, “Në dy fluturimet e fundit të Guardia di Finanza nuk janë gjetur më parcela të mbjella me cannabis” thuhet në një njoftim për shtyp, sipas të cilit në lidhje me një takim të Drejtorit të Përgjithshëm të Policisë Haki Çako me përfaqësuesit e Guardia Di Finanza dhe të Universitetit të Napolit.
Tani hyjmë në një fazë tjetër, eksporti. Ditët e fundit tonelata me kanabis janë eksportuar drejt Italisë me skaf. U rikthye linja ajrore e transportit të drogës, si në rastin e avionit që ngeci në Ishëm ndërsa nga shteti fqinj vijnë çdo ditë lajme për arrestimin e shqiptarëve që shpërndajnë drogë. Policia ka kapur drogë edhe në kufi me Maqedoninë dhe Greqinë. Megjithëse sasitë që transportohen drejt këtyre vendeve janë të pakta, sërish bie në sy tendenca për eksport. Në të gjitha rastet, policia nuk ka arrestuar kultivues apo trafikantë me sasi të mëdha kanabisi.
