Tre mjekët gjinekologë, Dritan Deçka, Helidon Klosi dhe Nazmie Ceni i thanë hetuesve se në fillim kishin menduar se gruaja kishte probleme me zemrën.
Nisur nga simptomat që shtatzana kishte paraqitur dhe pas konsultës së kryer mes tyre, mjekët thanë se të gjitha shenjat ishin për probleme me zemrën. Pasi konstatuan se ajo nuk kishte probleme me patologjinë e barrës, gruaja është transferuar për vizitë të specializuar në Qendrën Spitalore Universitare “Nënë Tereza” dhe nga aty në Sanatorium.
Pas një vizite të shkurtër është rikthyer në maternitet, ku edhe i është nënshtruar ekzaminimeve të mëtejshme. Lëvizjet e gruas në kushte të rënduara për shkak të barrës, sipas prokurorisë janë të gabuara. Hetuesit thanë se duke parë gjendjen e gruas, mjekët duhet të kishin thirrur kolegët e tyre nga QSUT apo Sanatoriumi. Sipas prokurorëve, gruaja nuk i ishte nënshtruar ekzaminimit pamor me eko të barkut. Kjo mangësi gjatë ekzaminimeve ka bërë që gruas t’i shkaktohet hemorragji dhe humbje e madhe e gjakut. Ndërkaq mjekët kanë pohuar para hetuesve se kur kanë vënë re se shëndeti i gruas po rëndohej ata vendosën të bëjnë ndërhyrjen por se nuk mundën të shpëtojnë as atë dhe as fëmijën.
