Komisioni i Posaçëm për Reformën në Drejtësi ka zhvilluar sot mbledhjen e radhës ku ka vendosur që brenda javës të mbyllet paketa ligjore.
Përfaqësuesit e tre partive politike, Pandeli Majko, Petrit Vasili dhe Oerd Bylykbashi, në një prononcim për media theksuan se kjo e sotmja ishte një mbledhje konstruktive mes palëve.
Majko bëri me dije se brenda javës do të mbyllet paketa ligjore për reformën në drejtësi.
“Ajo që është e rëndësishme është që javën që vjen e mbyllim historinë e paketës ligjore. Kemi diskutuar, kemi mbledhur opinionet e ndërkombëtarëve, po presim edhe opozitën të japë mendimin e fundit dhe javën tjetër e mbyllim. Nesër do të mblidhem prapë në orën nëntë, do të vazhdojmë të premte të punojmë që t’i japim fund paketës ligjore”, deklaroi Majko.
Bylykbashi u shpreh se u ra dakord që diskutimi të jetë i shëndetshëm dhe jo i nxituar.
“Sot komisioni diskutoi kalendarin për 6 ligjet. Ne si opozitë, me qëllim që të jetë një diskutim i shëndetshëm, real, jo i sforcuar, jo i nxituar deri më sot i këtyre 6 ligjeve thelbësore të bëhet me dy faza. Pra deri në datën 22 u ra dakord që të shqyrtohen ligjet kryesore siç janë ligji për SPAK dhe Prokurorinë e Posaçme Antikorrupsion, pra për këtë strukturë, ligji për organet e sistemit të drejtësisë dhe jemi të gatshëm që në datën 22 të jetë gati ligji për gjykatën kushtetuese. Do shohim nëse është e mundur edhe ligji për Prokurorinë brenda kësaj date. Por qëllimi që u ra dakord që diskutimi të jetë i shëndetshëm dhe jo i nxituar. Fati i Vettingut varet nga sa mazhoranca është e gatshme të mos shkelë kushtetutën”, theksoi Bylykbashi.
