Një 26-vjeçar i akuzuar për 4 plagosje është arrestuar sërish nga policia, por gjatë arrestimit ka kundërshtuar efektivët dhe i ka grisur uniformën njërit prej tyre.
Zyrtarisht policia deklaron se Shërbimet e Komisariatit të Policisë Nr. 2, kanë bërë të mundur arrestimin në flagrancë të dy shtetasve.
Më datë 14.09.2016, u arrestuan në flagrancë shtetasit:
– Bledar Matoshi, 27 vjeç, banues në Tiranë
– Klajdi Kodra, 26 vjeç, banues në Tiranë i dënuar më parë për “Armëmbaitje pa leje”.
Shtetasit Bledar Matoshi, gjatë kontrollit fizik i është gjetur një armë zjarri tip pistoletë, me mbishkrimin “CAL.380”.
Në momentin qe Bledar Matoshi është ndaluar nga shërbimet e Komisariatit ka qënë së bashku me shtetasin Klajdi Kodra, i cili ka kundërshtuar shërbimet e Rendit duke i goditur dhe dëmtuar (grisur) uniformën.
Kodra është djali i nënkampiones në qitje Lindita Kodra, ndërsa i ka shpëtuar edhe një atentati ndaj tij. Ai u lirua në korrik të këtij viti, pas vuajtjes 2 vjet të dënimit për 3 plagosje.
Por më 3 gusht ai plagosi sërish shtetasin Flamur Çullhaj tek Komuna e Parisit së bashku me vëllain e tij për një borxh.
Në vitin 2010, në rrugën “Vasil Shanto” mbetën të plagosur vëllezërit Klajdi dhe Roland Çeço, 25 dhe 27 vjeç. Policia asokohe shpalli në kërkim 20-vjeçarin Klajdi Kodra, si autor i dyshuar për plagosjet.
Ndërkaq, në vitin 2011, ai u akuzua për plagosjen me armë të 26-vjeçarit Roland Laçi. Ndërsa atentati ndaj Kodrës ka ndodhur në vitin 2013, ku asokohe 23-vjeçar, Kodra u qëllua me një plumb në këmbë.
