Partia Demokratike në një dalje për mediat ka shpallur fitoren e Sherefedin Shehut në krye të Bashkisë së Dibrës. Sipas kësaj force politike e rëndësishme në këtë proces është mbarvajtja e procesit duke nisur që nga transportimi i kutive në qëndrat e numërimit të votave e deri tek dalja e rezultati.
Ndërsa deputetja socialiste Blerina Gjylameti e cila ka qenë në terren në Dibër për të menaxhuar procesin zgjedhor, tha se fitorja e kandidatit të majtë gjendet në kutitë e votimit, e në përfundim të procesit sipas saj, Muharrem Rama do të dalë fitues.
“Fitorja e kandidatit tonë është brenda kutive dhe këtë do ta dëshmojmë në fund të numërimit”, u shpreh Blerina Gjylameti.
Ajo tha se nëse gjithçka shkon në rregull dhe pa incidente, procesi i numërimit të votave pritet të përfundojë pasditen e nesërme.
Deklarata e saj u bë rreth orës 19:45, vetëm pak çaste pasi ishte mbyllur procesi i votimit.
Ajo i bëri thirrje autoriteteve që të sigurojnë transportimin e materialeve zgjedhore.
Qytetarët e Dibrës votuan sot mes kandidatit të majtë, doktor Muharrem Ramës, dhe të kandiduarit nga PD, Sherefedin Shehu.
Zgjedhjet u mbajtën pas shkarkimit të ish-kryebashkiakut Shukri Xhelili i cili u përfshi në një skandal seksual.
