Biznesmeni Fadi Mitri, i rrahur barabarisht të shtunën, ndodhet ende në spital ku po merr ndihmën mjekësore pas dhunës çnjerëzore nga disa persona që përplasën automjetin me të cilin ai udhëtonte si pasagjer në afërsi të Laknasit. Dëshmia e tij ka nxjerrë në dritë të tjera detaje nga akti kriminal që i rrezikoi atij jetën.
55- vjeçari është marrë në pyetje nga hetuesit dhe mësohet se ka dëshmuar se personat që e sulmuan, e kërcënuan duke i thënë: “Ik nga Shqipëria ose ndërprit punimet”, raporton TV Klan.
Rrëfimi i tij përforcon dyshimet se ngjarja nuk ka qenë një konflikt i çastit, siç raportoi fillimisht policia, por një aksident i qëllimshëm për të sulmuar e kërcënuar me jetë biznesmenin.
Këto dyshime shtohen edhe nga fakti se policia ka vendosur efektivë të saj në ruajtje të biznesmenit. Një patrullë qëndron pa ndërprerje në spitalin ku po kurohet ai.
Autorët udhëtonin me një volksëagen tuareg, me targa të huaja, për të cilin policia thotë se është lehtësisht i identifikueshëm pasi është i dëmtuar në pjesën e përparme.
Por deri tani ata nuk janë kapur. Në polici janë shoqëruar 9 persona, të cilët janë marrë në pyetje.
Nga burime të pakonfirmuara mësohet se kanë qenë tre persona që pasi kanë goditur automjetin Mitsubishi, ku udhëtonte Mitri, e kanë nxjerrë me forcë nga makina dhe kanë nisur ta qëllojnë me shkop bejzbolli atë dhe shoferin e tij, duke i shkaktuar lëndime në kokë dhë në trup.
Kjo foto i’u bë biznesmenit pak çaste pasi autorët ishin larguar dhe ai po merrte ndihmën e parë nga disa kalimtarë të rastit.
Versionin e tentativës për vrasje e përmendi në një reagim edhe ish-Kryeministri Berisha që deklaroi se ata të cilët i organizuan vrasjen me aksident automobilistik janë eksponentë të mafjes qeveritare, të cilët kishin dalë në pritë për t’i marrë dhe për të larguar kompaninë e madhe që ai përfaqëson nga Shqipëria.
Dhunimi barbar i biznesmenit libanez me pasaportë amerikane është një këmbanë alarmi për sigurinë e sipërmarrësve të huaj që kanë zgjedhur Shqipërinë për të investuar dhe imazhi më i keq i Shqipërisë në botë, si një vend i egër dhe i pasigurt.
