Një ngjarje e rëndë ka ndodhur në Ruhpolding të Gjermanisë. Mësohet se një drejtues mjeti 64-vjeçar ka përplasur 3 prej 5 fëmijëve që po kalonin rrugën. Siç mësohet nga mediat e ndryshme gjermane, të gjithë fëmijët ishin shqiptarë. Raportimet e fundit kanë treguar se 3 fëmijët janë jashtë rrezikut për jetë, ndërsa dy tjerët që i shpëtuan aksidentit trajtohen nga psikologët për shkak të shokut të përjetuar.
Sipas Kryqit të Kuq bavarez, që të pesë fëmijët janë dërguar në spitalet më të afërt, ndërsa për shkak të pamjeve të rënda, në vendngjarje ka dalë edhe ekipi i ndërhyrjes së shpejtë në rast të krizash.
Drejtuesi 64-vjeçar nga Ruhpoldingi nuk ka mundur ta parandalojë aksidentin. Ai gjithashtu ka përjetuar një shok, ndërsa nuk ka pësuar lëndime. Nga 5 fëmijët, 2 vajza kanë përjetuar lëndime të rënda dhe me helikopter janë dërguar në Klinikën Traunstein, ku është shtruar edhe një vajzë tjetër, për shkak të shokut që kishte përjetuar.
Në vendngjarje kanë dalë edhe prindërit e fëmijëve të cilët gjithashtu janë marrë nën përkujdesje të ekipit të intervenimit të shpejtë. Që të 5 fëmijët janë nga Shqipëria dhe farefis në mes vete, ndërsa tashmë që një kohë të gjatë janë duke jetuar në Gjermani.
