Kur ka mbetur më pak se një vit nga zgjedhjet e ardhshme Edi Rama ka nisur ti bëjë llogaritë edhe pa Ilir Metën dhe Koço Kokëdhimën.
Për këtë arsye kryeministri ka nisur të forcojë bashkëpunimin me partitë e tjera aleate, sidomos PDIU-në e Shpëtim Idrizit, duke e “blerë” këtë fundit me disa poste në administratë.
Brenda pak ditëve, Partia Drejtësi, Integrim dhe Unitet e cila iu bashkua koalicionit qeverisës para zgjedhjeve lokale të vitit të kaluar ka marrë drejtimin e disa drejtorive të rëndësishme në vend, Drejtorinë e Arkivave, por edhe drejtimin e AKU-së.
Por duket se ky është vetëm fillimi. Pritet që në ditët e ardhshme të ketë të tjera lëvizje në administratë, kryesisht në qarkun e Vlorës.
Disa ditë më parë, në bashkinë e Sarandës u zyrtarizua nënkryetari i katërt i kësaj bashkie, post i cili do të mbahet nga kreu të degës së PDIU-së në Sarandë.
Por të tjera lëvizje pritet të ndodhin në qytetin jugor.
Janë katër drejtori në Sarandë, të cilat aktualisht drejtohen nga përfaqësues të PS-së dhe që pritet ti kalojnë PDIU-së.
Partia e drejtuar nga Shpëtim Idrizi pritet që të marrë drejtimin edhe të disa drejtorive në Vlorë dhe Fier, zona këto ku PDIU ka një numër të konsiderueshëm mbështetësish.
Në shënjestër për t’u shkarkuar nga puna në administratë mësohet se janë edhe njerëzit e emëruar nga Koço Kokëdhima dhe që njihen si mbështetës të ish-deputetit.
Marrëdhëniet mes Kokëdhimës dhe Ramës kanë prekur fundin. Ish-deputeti i Vlorës ka nisur fushatën në jug kundër Ramës, por edhe kryeministri ka gati hakmarrjen për ish-mentorin e tij.
