Pavarësisht propagandës së qeverisë, kriza ekonomike që ka kapur vendin tonë ecën me hapa të frikshëm. Plot 126 kompani në të gjithë vendin kanë shpallur falimentin.
Drejtoria e Tatimeve ka dorëzuar në gjykatë listën e bizneseve që duan të mbyllin aktivitetin.
Nga viti në vit vihet re një rritje e ndjeshme e numrit të kompanive që kërkojnë falimentit pasi sipas Drejtorisë së Përgjithshme e Tatimeve gjatë vitit 2015 në gjykatë janë çuar 118 kompani kundrejt 126 gjatë këtij viti.
Në listë konstatohen një sërë kompanish të mëdha të cilat kanë kontribut në jetën ekonomike të vendit.
Qyteti me numrin më të madh të bizneseve që kanë mbyllur aktivitetin është Vlora, në listë numërohen 36 të tilla, ndërsa Durrësi renditet në vendin e dytë me 27 shoqëri.
Në kryeqytet ndërkohë numërohen vetëm 6 subjekte të cilat kanë shpallur falimentin.
Procedurat e komplikuara të falimentit kanë detyruar qeverinë që të hartojë një projektligj të ri i cili aktualisht është në diskutim në komisionet parlamentare.
Drafti i ri, parashikon ngritjen e Gjykatës së Falimentit, si një strukturë brenda gjykatës së rrethit, e cila do të merret me të gjitha procedurat e falimentit.
