Komisioni Qendror i Zgjedhjeve informoi sot se para fillimit të shpërndarjes së bazës materiale nga KZAZ nr. 19 për çdo QV, partitë politike kanë kërkuar ndryshimin e anëtarësisë së 116 Komisioneve të Qendrave të Votimit nga 118 KQV në total.
Pra vetëm pak para fillimit të shpërndarjes së materialeve zgjedhore, KZAZ me kërkesë të partive politike për ndryshim të anëtarësisë së KQV-ve, ka marrë 116 vendime për lirimin e anëtarëve të emëruar më parë dhe emërimin e anëtarëve të rinj.
Ndryshimi i anëtarësisë së 98.3% e Komisioneve të Qendrave të Votimit, bën që edhe ata pak komisionerë të trajnuar nga KQZ, të mos jenë pjesë e procesit zgjedhor.
Por kjo lëvizje e partive kryesore duke futur komisionerë të patrajnuar, por militantë të tyre të besuar, duket se është e mirëmenduar. Si PS-ja, ashtu edhe PD-ja kanë vendosur t’i ndryshojnë komisionerët një ditë para zgjedhjeve nga frika se mos ata blihen nga kundërshtarët. Duket se zgjedhjet në Dibër, edhe pse të pjesshme, do të sjellin përplasje në politikën shqiptare.
