Deri më tani Policia e Shtetit ka këshilluar shoferët lidhur me ndryshimet e fundit në Kodin Rrugor.
Pas 10 shtatorit, sipas policisë, do zbatohen masat administrative që parashikon Kodi Rrugor. Këto ndryshime parashikojnë që për mos zbatim të nenit 170, masa administrative varion nga 5.000 deri në 15.000 lekë , si dhe masa plotësuese pezullim i Lejes së Drejtimit nga 6 muaj deri në një vit për mungesë të pajisjes fiksuese kur është duke transportuar fëmijë nën moshën 12 vjeç.
Drejtoria e Policisë Rrugore në bashkëpunim me Drejtoritë Vendore të Policisë në Qarqe dhe Drejtoritë Vendore për Kufirin dhe Migracionin po vijojnë fushatë sensibilizuese për ndërgjegjësimin e përdoruesve të rrugës për respektimin e rregullave të Qarkullimit Rrugor. Por njëkohësisht paralel me masat sensibilizuese kanë vijuar edhe masat ndëshkuese ku gjatë 24 orëve të fundit janë arritur këto rezultate. Janë vendosur gjithsej 1.350 masa administrative.
Duke përdorur Dragerat dhe Radarin, nga shërbimet e Policisë Rrugore janë arrestuar në flagrancë 4 drejtues mjetesh, nga këta 3 të pa pajisur me Leje drejtimi dhe 1 drejtues mjeti në gjendje të dehur. Janë pezulluar gjithsej 23 Leje Drejtimi , nga këto: 2 për pije alkoolike, 14 për shpejtësi dhe 7 për shkelje të tjera të ndryshme.
Gjate ditës së djeshme janë informuar 11.567 drejtues mjetesh për ndryshimin e nenit 170 te Kodit Rrugor. Po në të gjithe vendin janë këshilluar 463 drejtues mjetesh për mos vendosje të rripit të sigurimit. Janë vendosur 86 masa për përdorim celulari, 18 masa për mos vendosje të kaskës mbrojtëse, si dhe 188 masa të tjera janë për shpejtësi, parakalim të gabuar, etj. Si dhe janë dërguar në OASH, 23 drejtues mjetesh . Gjithashtu janë këshilluar drejtues të automjeteve për shkelje të lehta të Kodit Rrugor.
