Drejtori i Autoritetit Kombëtar të Ushqimit, Isuf Shehu është shkarkuar nga detyra.
Ka qenë mungesa e sigurisë ushqimore shkaku i largimit të tij. Isuf Shehu i përket PDIU-së dhe u vu në këtë detyrë në janar të këtij viti ku kjo parti drejtuar nga Shpëtim Idrizi, u përfshi në qeverisje me dy drejtorë të rëndësishëm. Isuf Shehu ka qenë nënkryetar i Bashkisë së Tiranës. Mësohet se Idrizi në takimet që ka zhvilluar si me Ramën, ashtu edhe me bashkëkryetarin e koalicionit qeverisë, Ilir Meta, ka kërkuar përfshirje në nivelet e larta të qeverisjes.
Mesa duket ky shkarkim nuk është një shenjë positive në bisedat e fundit që Rama ka bërë me Idrizin. Nga ana tjetër vet kryeministri i vendit disa ditë më parë në konferencën live në Facebook u shpreh se në koalicionin PS –LSI ka dhe një komponent të ri që është PDIU-ja
“Njerëzit e kërkojnë dhe e meritojnë një përgjigje. Së shpejti do ulemi në tryezën e koalicionit dhe do diskutojmë projektin e katër vjeçarit të ardhshëm. Do vendosim si do paraqitemi para shqiptarëve për mandatin tjetër. Sot koalicioni ka edhe një komponent të ri, që është PDIU. Është një diskutim i nevojshëm, duhet bërë serioz, por të gjithëve u them se ky koalicion në gjykimin e të përditshmes mund të ketë shumë gjëra për të rrudhur buzët, por në gjykimin e strategjikes është një koalicion që po transformon Shqipërinë”, u shpreh me tej Rama.
