SHBA-ja ka konfirmuar se ka marrë nga dy aleatët e saj, Turqia dhe kurdët të implikuar në luftime në veri të Sirisë, një ndërprerje të luftimeve por Ankaraja e mohon.
“Orët e fundit, kemi marrë garancinë se të gjitha palët e implikuara do të ndërpresin luftimet dhe do të përqendrohen mbi kërcënimin e grupit Shteti Islamik”, njoftoi sot koloneli, John Thomas.
“Turqit dhe Forcat Demokratike Siriane (koalicion arabo-kurd të dominuar nga kurdët) kanë hapur kanale bisedimi me ne dhe mes tyre me qëllimin për të limituar luftimet”, shtoi ai duke përmendur një marrëveshje parimore për të paktën dy ditët në vijim.
Turqia, në konflikt me kurdët në territorin e saj, kërkon të evitojë që kurdët e Sirisë të formojnë një rajon autonom përgjatë kufirit të saj.
Por nga ana tjetër Ankaraja hodhi poshtë raportet për marrëveshje armëpushimi me milicinë kurde në veri të Sirisë.
Ministri për Çështje të Bashkimit Evropian i Turqisë, Omer Celik, tha se Ankaraja “nuk pranon në asnjë rrethanë kompromis apo armëpushim” me elementet kurde.
Autoritetet amerikane po ashtu i kanë bërë thirrje ushtrisë turke që të përqendrohet në luftën kundër grupit militant Shtetit Islamik.
Forcat turke kanë sulmuar luftëtarët kurdë, prejse kanë nisur ofensivën në Siri, javën e kaluar.
Turqia është alarmuar nga rritja e pushtetit të forcave kurde, të cilat janë dëshmuar si aleatë të fortë të SHBA-së në luftën kundër Shtetit Islamik.
