Artur Gjergji, 27 vjeçari nga qyteti i Durrësit kishte vetëm 4 ditë që kishte dalë nga burgu pasi u arrestua për drejtim mjeti pa leje.
I riu u arrestua sërisht mbrëmjen e djeshme në Portin e qytetit bregdetar, me 111 kg kanabis në automjetin e tij teksa ishte nisur drejt Italisë.
Burimet policore konfirmuan për “Panorama Online” se nuk është hera e parë që 27¬ -vjeçari arrestohet nga policia. Vetëm pak ditë më parë, në datën 19 Gusht ai ishte arrestuar nga policia e Durrësit sepse po drejtonte pa leje një motor, shkruan ‘Panorama.
“Më datë 18.08.2016, u arrestua në flagrancë shtetasi Artur Gjergji, vjeç 27, banues në Durrës, pasi dyshohet se në, në rrugën “Dëshmorët”, u kap duke drejtuar pa leje drejtimi motorin tip “Honda”. Neni 291 i Kodit Penal”, thuhet në komunikatën zyrtare të policisë.
Mësohet se i riu kishte vetëm 4 ditë, të premten e javës që lamë pas që kishte dalë, pasi ishte arrestuar për drejtim mjeti pa leje drejtimi. Por pas 4 ditësh ai arrestohet sërish, i akuzuar për trafik ndërkombëtar droge.
Njoftimi i policisë
“Më datë 29.08.2016, rreth orës 20:00, në PKK Port, Shërbimet e Policisë Kufitare në bashkëpunim me Sektorin kundër Narkotikëve pas kontrollit në Skaner të automjetit tip “Renault”, me targë AA241ND, ku u dallua një send i dyshimtë, e kanë kaluar këtë automjet për kontroll të imtësishëm në vijën e dytë. Nga kontrolli i imtësishëm i kryer në vijën e dytë në krye të karrocerisë në brendësi të saj u gjetën të fshehura 66 pako të mbështjella me natriban, gjithsej 111 kilogramë lëndë narkotike e dyshuar Cannabis Sativa.
Lënda narkotike dhe automjeti u sekuestruan në cilësinë e provës materiale. Në përfundim të veprimeve të para hetimore të kryera nga Specialistët kundër Narkotikëve u bë arrestimi në flagrancë i drejtuesit të automjetit, shtetasit:
• Artur Gjergji, 27 vjeç , banues në Durrës.
Vijon puna për zbardhjen e plotë të kësaj ngjarjeje. Materialet proceduriale i kaluan Prokurorisë së Krimeve të Rënda për veprën penale “Trafikimi i narkotikëve” parashikuar në nenin 283/a të Kodit Penal”
