Partia Demokratike ka depozituar në Kuvend pjesën tjetër të amendamenteve të ligjit për vettingun, pavarësisht se ky ligj u miratua në komision vetëm me votat e mozhorancës më 23 gusht.
Në total, PD ka depozituar 66 amendamente, të cilat do të shqyrtohen nesër në kuvend.
PD sqaron se amendamentet e paraqituara nga deputetët e opozitës për nenet 1-25, synonin garantimin e:
(i) përputhshmërisë së plotë të projektligjit me Kushtetutën, opinionet e Komisionit të Vencias dhe standardet ndërkombëtare;
(ii) llogaridhënien, pavarësinë, eficencën, shpejtësinë dhe saktësinë në ushtimin e funksionit nga organet e rivlerësimit;
(iii) respekimin e të drejtave dhe lirive themelore të njeriut;
(iv) përmbushjen e urdhërimeve të kushtetutëbërësit, që ka ngarkuar ligjvënësin me rregullimin e plotë, të detajuar dhe të saktë të të gjithë procedurës së rivlerësimit;
(v) transparencën e procedurës së përzgjedhjes së funksionarëve të organeve të rivlerësimit;
(vi) plotësimin e përmbajtes së projektiligjit, si dhe përmirësimin dhe qartësinë e tij, në funksion të garantimit të parimit të sigurisë juridike dhe standardeve të shtetit të së drejtës.
Në amendamentet e paraqitura nga PD, ndryshon roli i OMN, KLD dhe DSIK.
Sipas Partisë Demokratike ligji aktual i propozuar paraqet probleme të thella me Kushtetutën, ndërsa i hap rrugën kontrollit të qeverisë mbi organet e drejtësisë. PD nuk e votoi në Komisionin e Posaçëm ligjin dhe paralajmëroi dërgimin në kushtetuese.
