Prej disa orësh një zjarr i përmasave të mëdha ka përfshirë një zonë të pyllëzuar ku rrezikohen rreth 300 familje në Finiq në jug të vendit.
Forcat zjarrfikëse, një helikopter privat dhe një helikopteri i Ministrisë së Mbrojtjes po punojnë për të lokalizuar flakët, në mënyrë që të mos përparojnë në drejtim të banesave.
Burime nga vendi i ngjarjes bëjnë të ditur se si pasojë e erës përmasat e zjarrit janë rritur, por pas ndërhyrjes nga toka dhe nga ajri, intensiteti i zjarrit ka filluar të ulet.
Në një komunikim telefonik në “News24”, kreu i Emergjencave Civile, Shemsi Prençi bëri të ditur se deri tani ndërhyrja ka qenë e efektshme, pasi zjarri nuk ka më intensitetin që kishte në orët e para.
“Zjarri është favorizuar nga era e fortë. Forcat zjarrfikëse janë duke punuar për të shuar zjarrin. Kemi kërkuar ndihmë edhe nga vendet fqinje. Na ka ndihmuar helikopteri i ministrisë së mbrojtjes, kemi angazhuar edhe helikopter privat.”- deklaroi Prençi.
