Gjykata e Apelit ka liruar nga burgu përgjegjësin e landfillit të Sharrës, Besnik Braha. Ky i fundit u arrestua me akuzën “shpërdorim detyre” pas vdekjes tragjike të 17-vjeçarit Ardit Gjoklaj.
Apeli i caktoi atij masën e sigurisë “arrest shtëpie”. Mbetet për t’u parë nëse pas këtij vendimi të Apelit, kryebashkiaku Erion Veliaj do të protestojë sërish para gjykatës, sikundër veproi kohë më parë pas vendimit për çështjen e ndërtimeve te diga e liqenit.
Ndonëse është afërmendsh që nuk duhet pritur një protestë e tillë prej Veliajt, i cili ka heshtur që prej fillimit për vdekjen e Ardit Gjoklajt.
Opozita ndërkohë e akuzon vazhdimisht Veliajn si përgjegjës për vdekjen e të miturit dhe kushtet skandaloze të punës në landfill.
Një investigim i agjensisë BIRN hidhte dritë më shumë mbi skemën e shfrytëzimit të punëtorëve, përfshi edhe fëmijet, në landfillin e Sharrës që u promovua nga Bashkia Tiranë si një investim i përbashkët i partneritetit publik-privat./Lapsi
