Ish –anëtari i Asamblesë së Partisë Socialiste, Maqo Lakrori ka bërë një denoncim në polici pasi ka konstatuar vjedhjen e ndodhur në banesën e tij.
Ngjarja ka ndodhur gjatë orëve të vona të së shtunës duke gdhirë e diela, në rrugën “Mine Peza”, në kryeqytet, vetëm disa metra larg Komisariatit nr.3.
Burime nga Policia e Tiranës thanë dje se hajdutët kanë hyrë në një ambient të shtëpisë që përdorej si bodrum. Ndërsa nga denoncimi që Maqo Lakrori ka bërë në Polici, mësohet se aty janë vjedhur dy kompjuterë. Në vendngjarje kanë shkuar shërbimet e Komisariatit nr.3, menjëherë pasi është denoncuar vjedhja dhe kanë nisur veprimet për të zbardhur rrethanat e ngjarjes. Burimet thanë se nga veprimet e kryera në vendngjarje, ka rezultuar se hajdutët kanë hyrë pa forcë dhe pa thyer asgjë në bodrumin e shtëpisë ku banon familja Lakrori. Ndërsa dyshohet se për të hapur derën kanë përdorur një çelës të përshtatur për hapjen e brava të ndryshme. Nga këqyrja e vendit të ngjarjes, nuk është konstatuar të jetë vjedhur ndonjë objekt tjetër, përveç dy kompjuterëve që ishin denoncuar nga vetë i dëmtuari.
Ndërsa policia ka nisur punën për identifikimin dhe kapjen e autorëve të ngjarjes. HETIMI Ekspertët kriminalistë që kanë bërë këqyrjen e vendit të ngjarjes, kanë fiksuar disa gjurmë gishtash, të cilët u dërguan në Laboratorin e Kriminalistikës për t’u verifikuar. Nga ana tjetër, janë sekuestruar edhe pamjet e disa prej kamerave të sigurisë së bizneseve që ndodhen në rrugën “Mine Peza”, pranë banesës së Maqo Lakrorit. Pamjet po analizohen nga ana e oficerëve të Komisariatit nr.3, për të parë lëvizjet e personave të dyshimtë në zonën përreth, para, gjatë dhe pas orarit kur ka ndodhur ngjarja.
Nga veprimet e kryera në vendngjarje, policia dyshon se autor mund të ketë qenë një person i vetëm, por që mund të jetë ndihmuar edhe nga një i dytë, që e ka pritur në rrugë për të kontrolluar situatën. Megjithatë, deri tani ende nuk ka ndonjë person konkret të dyshuar për ngjarjen. Policia tha dje zyrtarisht se ka nisur procedim penal pa autor me akuzën e vjedhjes.
