SHBA-të kanë shënuar fitore në gjysmëfinalen e parë të basketbollit në Lojërat Olimpike, Rio 2016. Amerikanët mposhtën Spanjën me rezultat 82-76 , për të siguruar finalen e Rio 2016.
Dueli ishte i nxehtë nga fillimi, ku Spanjës nuk i shkoi shumë në sulm, por në mbrojtje bëri paraqitje të mira.
Vendimtar ishte Klay Thompson, i cili ishte i saktë nga perimetri, për të çuar epërsinë në 10 pikë në pjesën e parë.
Megjithatë, Spanja u kthye në vetëm 2 pikë disavantazh falë mbrojtjes së mirë dhe saktësisë në sulm, me DeAndre Jordan që shfaqi një paraqitje shumë të mirë.
Në pjesën e dytë vazhdoi ritmi i njëjtë, ku Spanja nuk dorëzohej as se si dhe herë në katër pikë, e herë në pesë pikë mbante disavantazhin, derisa Thompson dhe Jordan shpërthyen për të çuar në 15 pikë epërsinë e amerikanëve.
Deri në fund Pau Gasol u mundua të udhëheqë djemtë e Spanjës drejt një rikthimi, megjithatë kjo nuk ishte e mundur falë gabimeve të shumta në sulm.
Më i miri i takimit ishte Pau Gasol me 23 pikë dhe tetë kërcime, teksa tek SHBA-të pikë dyshifrore shënuan tri lojtarë.
DeAndre Jordan nuk arriti më shumë se nëntë pikë, por kishte plot 16 kërcime, duke shfaqur herë-herë spektakël të NBA në parket, teksa Thompson me 22, Durant me 14 dhe Irving me 13 pikë ishin prej më të mirëve.
Amerika në finale pret fituesin e duelit Australi – Serbi që zhvillohet në orën 00:00.
