Brokoli është një perime shumë e përdorur gjatë viteve të fundit.
Duke e konsumuar rregullisht këtë perime jashtëzakonisht të shëndetshme do të jeni në gjendje të reduktoni shanset për çdo lloj sëmundjeje të zemrës dhe probleme shëndetësore, si: diabet i tipit 2, si dhe disa lloje të kancerit. Falë flavonoideve, të cilat mund të gjenden te brokoli, organizmi ynë është në gjendje të luftojë më lehtë kundër sëmundjeve.
Duke konsumuar brokoli çdo tre ditë ju do ta forconi të gjithë organizmin dhe sistemin imunitar, do të reduktoni inflamacionet dhe do të përmirësoni dhe nxisni funksionin e sistemit të përgjithshëm kardiovaskular. Sipas vlerës ushqyese, në 100 gram brokoli ka vetëm 28 kalori dhe 3 gram proteina.
Kur vjen puna për të furnizuar organizmin tuaj me dozat ditore të rekomanduara të përbërësve të caktuar, brokoli përmban 67% të dozës ditore të vitaminës C, 20% të vitaminës A dhe 110% të vitaminës К, shkruan revista Shije. Përveç kësaj, kjo perime shumë e shëndetshme përmban ushqyes të shumtë që kanë veti shumë të fuqishme anti-kancerogjene, sasi të vogël të selenit, thiamine, riboflavin, kalcium, hekur, magnez, fosfor, kalium, fibra, acid folik dhe mangan.
Gjithashtu, brokoli përmban sasi të madhe të komponimeve fenolikë (këta janë antioksidantë, të cilët posedojnë aftësi për të reduktuar rrezikun e goditjeve në tru, kancerit, sëmundjeve kardiovaskulare dhe janë elemente kyçë në luftën kundër llojeve të ndryshme të inflamacioneve që mund të ndodhin në organizëm). Fenolet janë pa shije dhe të qëndrueshme, që do të thotë se nuk mund të shkatërrohen nga temperaturat e larta. Kur konsumojmë këta përbërës, organizmi ynë i përthith dhe i dërgon në pjesë të caktuara të trupit, ose i ruan në mëlçi.
Më pas, ata përhapen përmes gjakut, duke reduktuar kështu inflamacionet me aktivitetin anti-oksidativ. Organizmi i njeriut nuk mund të prodhojë vetë fenole, që do të thotë se ne kemi nevojë për t’i marrë këta përbërës nëpërmjet ushqimit që konsumojnë. Zgjedhja më e mirë për të arritur këtë është duke konsumuar perime nga familja e lakrave. Mjekët na rekomandojnë që t’i konsumojmë këto perime, sidomos brokolin, të paktën njëherë në tre ditë.
