Një tjetër akuzë vjen nga Kosova për Federatën Shqiptare të Futbollit. Sipas homologes së saj në Kosovë, FSHF i ka bërë ftesë futbollistit të U-21 dhe lojtarit të Partizanit, Ylber Ramadani.
Gazeta Express shkruan se Kosova tashmë ka siguruar shërbimet e Milot Rashicës, Alban Mehës, Herolind Shalës dhe Sinan Bytyqit, ndërsa është në pritje të përgjegjës së futbollistëve të tjerë që luajnë në skuadrat tjera të mëdha të Evropës.
Por, sipas saj Kosovës po i punohet pas shpine nga FSHF, pasi trajneri i U-21 të Shqipërisë, Redi Jupi i ka bërë ftesë futbollistit U-21 të Kosovës që luan të Partizanin, Ylber Ramadani.
Sipas të njëjtave burime nga ky veprim janë çuditur në FFK, kur dihen rrethanat që po kalojnë të dy këto Kombëtare dhe kur dihet që Ramadani ka qenë pjesë e U-19 dhe U-21 i Kombëtares së Kosovës.
“Vërtet jemi çuditur jashtëzakonisht shumë nga ky veprim, duke pasur parasysh rrethanat e reja të dy Kombëtareve. Ne e kemi kuptuar vetëm nga mediat që përzgjedhësi i Shqipërisë U-21 e ka ftuar Ramadanin, një lojtar që tërë jetën e tij ka qenë i lidhur me futbollin e Kosovës, duke filluar me klubet e shumta të Kosovës, e për të vazhduar me reprezentacionet U-19 dhe U-21”, – tha menaxheri i Kombëtares së Kosovës, Bajram Shala për Gazeta Express.
Bajrami konfirmoi se Ramadani ka qenë dhe është në listën e zgjeruar të përzgjedhësit Bunjaki, i cili e sheh si pjesë të projektit të kualifikimeve për botërorin ‘Rusia 2018”.
“Ajo që mund të konfirmoj është se, Ylber Ramadani është në listën e zgjeruar të përzgjedhësit Bunjaki që është dërguar në UEFA, në të cilën Kosova llogarit në ndeshjet kualifikuese për botërorin ‘Rusi 2018’. Kjo nuk duhet të nënkuptohet si ftesë e menjëhershme për të, por është pjesë e projektit të përzgjedhësit Bunjaki”, tha në fund Shala.
Ramadani ende nuk ka vendosur nëse do të pranojë ftesën e Shqipërisë apo do të vazhdojë të luaj për Kombëtaren e Kosovës.
