Doni të dini se si mund të shpëtoni jetën e një të moshuari që sapo ka pësuar një goditje në tru? I jepni menjëherë një aspirinë. Ky trajtim i thjeshtë mund të parandalojë një sulm ishemik kalimtar ose një tjetër goditje në tru.
Sa më shpejt t’i jepni aspirinën të moshuarit, aq më shumë i kufizoni dëmtimet, si të përkohshme ashtu edhe të përhershme.
Njerëzit duhet të pinë aspirina menjëherë pasi kanë pësuar një goditje të vogël në tru, për të parandaluar ose ulur rrezikun e një goditjeje më të rëndë, thonë shkencëtarët.
Shkencëtarët tek Universiteti i Oksfordit thonë se, edhe pse mjekët këshillohen gjithmonë që të japin këtë ilaç, ata e nënvlerësojnë dhe e shtyjnë trajtimin.
Ata kërkojnë të përcaktohen udhëzime të qarta si për doktorët ashtu edhe pacientët. Ekipi rishikoi të dhënat nga 15 studime të ndryshme, ku janë përfshirë me mijëra njerëz që kanë marrë menjëherë aspirinë pas një goditje në tru, për të parandaluar një sulm të dytë.
Sulmet ishemike kalimtare, ose goditjet e vogla në tru, prekin më shumë njerëzit mbi 60 vjeç dhe ndodhin kur ndërpritet furnizimi me gjak i trurit për një periudhë të shkurtër. Disa nga simptomat e goditjeve të vogla në tru janë mpirje të krahëve, këmbëve, fytyrës (sidomos në njërën anë të trupit), çrregullim i të folurit dhe pamundësi për të kuptuar të tjerët. Goditja në tru mund të shkaktojë gjithashtu probleme me shikimin tek njëri ose të dy sytë, humbje të baraspeshës ose kontrollit, humbje të menjëhershme të vetëdijes dhe dhimbje koke të menjëhershme pa asnjë shkak.
Shanset për të pësuar një tjetër goditje në tru janë më të mëdha në ditët pas sulmit të parë. Studime të mëparshme kanë sugjeruar se aspirina ndihmon në zvogëlimin e këtyre shanseve sidomos në periudha afatgjate, duke holluar gjakun dhe parandaluar mpiksjen e gjakut.
Por, përfitimi kryesor qëndron në orët ose ditët e para pas goditjes në tru ose sulmit ishemik kalimtar.
Nëse merret aspirinë në këtë moment, atëherë rreziku për të pësuar një tjetër goditje në tru ulet nga 1 në 20 njerëz në ditë, në një në 100.
