Sezoni i ri i Champions League ka hyrë në fazat e nxehta. Sot dhe nesër në mbrëmje do të luhen ndeshjet e para të fazës së “play off”-it të kompeticionit më të rëndësishëm evropian për klube. Ndeshja që do të tërheqë të gjithë vëmendjen sot do të jetë ajo që do të zhvillohet në Rumani mes Manchester City-it të Guardiola-s dhe Steauas së Bukureshtit.
Pas debutimit aspak bindës në Premier League, Guardiola do të kërkojë të kuptojë nëse ka arritur t’i përcjellë skuadrës mentalitetin e duhur për një kompeticion kaq të rëndësishëm si Champions, gjithmonë tabu për “Citizens”. Lojtërave të Pepe do t’i duhet një fitore në transfertë për të vënë në kasafortë kualifikimin. Ndërkohë, në orët e fundit ka krijuar shumë diskutime mungesa e Yaya Toure, i cili nuk ka udhëtuar me ekipin drejt Rumanisë. Por ka qenë vetë trajneri spanjoll që i ka dhënë fund polemikave, pavarësisht zërave të shumtë që flasin për një largim të mesfushorit.
“Yaya Toure po stërvitet shumë mirë, por nuk jam i sigurt nëse është gati për të luajtur. Për këtë arsye kam zgjedhur ta lë në Mançester”. Në vazhdim trajneri ka folur edhe për situatën e portierit Hart, gjithashtu i përfolur për një largim nga klubi anglez: “Qëkur kam ardhur këtu ka qenë gjithmonë perfekt dhe profesional, brenda dhe jashtë fushës. Merkato? Nuk është momenti për të folur për lojtarë të skuadrave të tjera”, ka thënë Guardiola. Por Steaua-City nuk do të jetë ndeshja e vetme e mbrëmjes së sotme: Ajax-Rostov, Dinamo Zagabria-Salisburgo, Copenaghen-Apoel dhe Young Boys-Moenchengladbach janë sfidat e tjera që pritet të dhurojnë spektakël.
