Një shtetas në kërkim nga Maqedonia u arrestua dje në Shqipëri me akuzën për terrorizëm.
Dyshohet se i arrestuari ka marrë pjesë në formacionet luftuese në Siri si pjesë e grupeve të konsideruara si terroriste. Lajmi është bërë me dije nga Policia e Shtetit, e cila njoftoi se drejtoria e Antiterrorit pas një aksioni të saj ka vënë në pranga shtetasin Imerli Avmeti, vjeç 46, banues në Gostivar, Maqedoni. Sipas Policisë, mësohet se arrestimi i tij ditën e djeshme u bë për ekzekutimin e urdhrit të “arrestit ndërkombëtar”, lëshuar nga Prokuroria Maqedonase, për veprën penale “pjesëmarrje në ushtri, polici, formacione paramilitare të huaja”, parashikuar nga neni 322 i Kodit Penal Maqedonas. Pas arrestimit të këtij të kërkuari, policia bënte me dije dje se materialet i kaluan Prokurorisë së Rrethit Gjyqësor Tiranë për kryerjen e procedurave ligjore për ekstradimin e tij drejt Maqedonisë.
HETIMI
Ende nuk dihet si ka ndodhur që shtetasi Imerli Avmeti ka hyrë në Shqipëri, duke qenë person në kërkim. Ai, megjithatë, ishte shpallur në kërkim nga Maqedonia më 13 gusht 2016, pra dy ditë më parë. Burimet e Policisë kanë thënë se informacioni për vendndodhjen e 46-vjeçarit është marrë nga drejtoria e Antiterrorit, e cila ka nisur hetimet në lidhje me të dyshuarin. Bëhet me dije se pas lokalizimit të të kërkuarit, ai është mbajtur në vëzhgim për 48 orë nga agjentë të Antiterrorit. Nga mbajtja në vëzhgim është konstatuar se Imerli Avmeti ka kontaktuar persona të indoktrinuar dhe është përpjekur të komunikojë me shtetas që kanë pasur ose kanë prirje ekstreme. Dyshimet e policisë dhe të Antiterrorit janë se 46-vjeçari është përpjekur të rekrutojë shtetas të ndryshëm shqiptarë për t’i nisur më pas në drejtim të Sirisë, me qëllim pjesëmarrjen në formacione luftuese, që janë në listën e zezë të Kombeve të Bashkuara.
Pas veprimeve të dyshimta të 46-vjeçarit nga Gostivari dhe mbajtjes së tij nën kontroll për 48 orë në Tiranë, agjentët e Antiterrorit kanë vendosur të ndërhyjnë. “Imerli Avmeti dyshohet se ka ardhur në Shqipëri për të rekrutuar luftëtarë për t’i dërguar në Siri, me qëllim bashkimin me forcat e Shtetit Islamik të ISIS, ku ka qenë pjesë e tyre edhe më parë”, kanë bërë me dije burimet e Policisë. Sipas tyre, Imerli Avmeti pas arrestimit pritet që të ekstradohet në Maqedoni, ku do të gjykohet si mbështetës i ISIS dhe rekrutues i personave që kryejnë aktivitete terroriste. Policia ka thënë se urdhri i “arrestit ndërkombëtar”, lëshuar nga Prokuroria Maqedonase për shtetasin Imerli Avmeti, vjeç 46, banues në Gostivar Maqedoni mban datën 13.08.2016. Ndaj tij janë ngritur akuza për “pjesëmarrje në ushtri, polici, formacione paramilitare të huaja”. Në Tiranë mësohet se dosja i ka kaluar për kompetencë Prokurorisë për Krimet e Rënda.
