Qendra Spitalore Universitare Tiranë ka siguruar ilaçin për fëmijët e sëmurë me leucemi. Kanë qenë mjekët e QSUT që e kanë bërë të ditur lajmin, duke deklaruar se bari Asparaginaze është siguruar deri në fund të vitit.
Duket se ilaçi është siguruar pas vizitës së deputeteve të Partisë Demokratike, Albana Vokshi e Albina Deda.
Fëmijët me leucemi dhe prindërit e tyre kanë protestuar disa herë për gjetjen e barit pasi jeta e fëmijëve u rrezikua për muaj me radhë.
Deputetja demokrate Albana Vokshi i ka kërkuar sërish llogari ministrit të Shëndetësisë, Ilir Beqaj për mungesën e ilaçit për fëmijët me leucemi. Dje Vokshi tha se Ministri Beqaj përhap propagandë me materiale të montuara por se nuk përgjigjet për mungesën e ilaçit të fëmijëve me leucemi.
“Ministri i Shëndetësisë Beqaj nuk reagoi për mungesën prej më shumë se 3 muajsh te Asparaginaza-s, medikamentit për kimioterapinë e dhjetëra fëmijëve të prekur nga tumore…të cilëve çdo ditë ju rrezikohet jeta. Ministri Beqaj nuk ka dëgjuar zërin e nënave dhe nuk ka parë lotët e tyre kur luten dëshpërimisht për mbështetje nga shteti për shpëtimin e jetëve të fëmijëve të tyre…Ministri Beqaj nuk ka reaguar as ndaj thirrjeve të shoqërisë civile: shoqatës “together for life” dhe deklaratës së Komitetit Shqiptar të Helsinkit. Ministri Beqaj nuk ka reaguar as për humbjen e 6 jetëve të pacientëve të prekur me HIV/AIDS prej mungesës së barnave për shkak të neglizhencës se Ministrit. Ministri nuk reagon as për mungesat e shumta në çdo spital e qendër shëndetësore…duke rrezikuar kështu shëndetin dhe jetën e pacientëve. Por ka një javë që shpërndan materiale të montuara për vizitat e tij në bregdet”, shprehet Vokshi.
Sipas saj Shqipëria është njësoj si para 1 shekulli, ku pacientët vdesin për mungesën e një gjilpëre.
