Nëna e një të riu të dënuar është arrestuar nga Specialistët për Krimet në Komisariatin e Policisë Krujë pasi tentoi të fuste 6 celularë në burg.
Sipas të dhënave zyrtare është arrestuar në flagrancë shtetasja Liljana Toluli 41 vjeçe, banuese në Kamëz, Tiranë.
Arrestimi i saj u bë pasi më datë 09.08.2016, duke shfrytëzuar orarin e vizitave në burgun e Fushë – Krujës, ka tentuar të fusë për djalin e saj, i cili vuante dënimin, 6 copë celularë.
Celularët i kishte fshehur në një bombël gazi që përdoret për kafe, të cilët u sekuestruan në cilësinë e provës materiale.
Materialet i kaluan Prokurorisë së Rrethit Gjyqësor Krujë për veprime të mëtejshme për veprën penale “Dhënia ndihmë një të burgosuri për largim”.
