Zinedine Zidane ka vendosur me ftohtësi dhe objektivitet për listën e skuadrës së Real Madridit për ndeshjen e nesërme të Superkupës së Evropës. “Galaktikët” do të tentojnë 5 trofe këtë sezon dhe francezi duhet të jetë i kujdesshëm me lojtarët e tij të rëndësishëm për t’i paraprirë çdo episodi të pakëndshëm.
Kështu, teksa Sevilla pret kampionët e Evropës për betejën e “superkampionit”, tekniku ka lënë në Madrid mesfushorët Gareth Bale dhe Toni Kroos. Uellsiani u rikthye në stërvitje të shtunën pas pushimeve të zgjatura pas Evropianit, por klubi dhe lojtari kanë rënë dakord që ndeshja e nesërme është ende herët për të. Për sa i përket gjermanit Kroos, Zidane mendon që kampioni i botës ka zhvilluar pak seanca stërvitore për të qenë gati për këtë ndeshje dhe ka vendosur të mos e thërrasë për sfidën në Norvegji.
Ndërkohë, Karim Benzema, i cili ka pasur probleme fizike gjatë gjithë fazës përgatitore, duket se ia ka dalë mbanë pas testeve në seancat e fundit stërvitore dhe Zidane ka vendosur ta përfshijë atë në ekip. Sikur të mos mjaftonte mungesa e yllit Cristiano Ronaldo, Bale dhe Kroos mërzisin edhe më tepër tifozët madrilenë. Tani e gjithë vëmendja do të jetë te Karim Benzema dhe Alvaro Morata. Sulmuesi francez nuk ka luajtur asnjë minutë të vetme këtë verë, por e kreu të plotë seancën stërvitore të së shtunës.
Morata, nga ana tjetër, duket në formë. Casemiro (m) pritet të jetë titullar i padiskutueshëm i Real Madridit nesër, shkruan “Marca”
Kjo është lista e Real Madridit për Superkupën e Evropës: Casilla, Yáñez, Luca Zidane, Carvajal, Ramos, Varane, Nacho, Danilo, Marcelo, James, Casemiro, Kovacic, Modric, Isco, Asensio, Llorente, Benzema, Vázquez, Morata dhe Mariano.
