Renato Malota është blerja më e fundit e Partizanit. Mbrojtësi firmosi kontratën me të kuqtë dhe të hënën do të prezantohet në ambientet e klubit.
Kryeqytetasit fituan garën për 27-vjeçarin e lindur në Lezhë, për të cilin u përfol se interesohej një tjetër klub shqiptar që po shkruan historinë në Europë, Shkëndija e Tetovës. Por, në fund fitoi projekti ambicioz i Partizanit, që në sezonin e ri është një prej pretendentëve për titullin kampion, por edhe lidhja e lojtarit me klubin. Një zgjedhje zemre, për faktin se ish-kapiteni i Kukësit i ka mbrojtur në të kaluarën ngjyrat e “demave”. Mbrojtësi ka luajtur me Partizanin në sezonin 2008–2009, ku në 22 ndeshje ka shënuar edhe një gol.
Renato Malota ishte një përforcim i nevojshëm për repartin difensiv të trajnerit Adolfo Sormani, për të plotësuar hapësirën e lënë nga largimi i Ditmar Bicajt. Kjo e ka detyruar teknikun italian që të aktivizojë në qendër përkrah Krasniqit, Renato Arapin, që si pozicion natyral është mbrojtës i majtë.
Goditja e Partizanit në merkato vjen në momentin kur skuadra është lënë për disa ditë pushim nga stafi teknik, përpara angazhimeve me rusët e Krasnodarit në fazën play-off të Europa League. Një duel të cilin për fat të keq Malota do ta humbasë, prej aktivizimit me Kukësin në eliminatoret e këtij turneun. Mbrojtësi do të luante në Europë vetëm në rast se Partizani do të realizonte mrekullinë duke u kualifikuar në fazën e grupeve. Arritje që skuadra, tifozët dhe vetë lojtarët ëndërrojnë ta realizojnë.
