Ndërtesa e Kuvendit të Kosovës është sulmuar me predha antitank në orët e vona të së enjtes.
Sipas policisë së Kosovës, sulmi ka ndodhur në Rrugën ‘Agim Ramadani” në Prishtinë, me një mjet të dyshuar shpërthyes, llojin e të cilit nuk e ka specifikuar.
Ndërkohë përveç dëmeve materiale, nuk është raportuar për të lënduar. Por përveç forcave policore, zjarrfikëset dhe ambulancat në vendin e ngjarjes shkuan edhe forca të KFOR-it.
Ndërsa në lagjen “Taukbahçe” të kryeqytetit u gjend një motoçikletë e djegur tërësisht. Policia dyshon se ajo është motoçikleta me të cilën kanë lëvizur sulmuesit dhe po kryejnë një hetim atje.
Policia ka bllokuar të gjitha rrugët e Prishtinës dhe ka kryer kontrolle të qytetarëve. Nuk dihet qarte se cilat mund të jenë motivet e këtij sulmi mbi ndërtesën e Parlamentit të Kosovës, ndërsa ai vjen një ditë para se Kuvendi i Kosovës të miratojë demarkacionin me Malin e Zi.
Ekspertët gjithashtu kanë shkuar në vendin e ngjarjes për të hetuar rastin. Rastin e ka dënuar i pari subjekti politik AAK, duke e quajtur si akt kriminal dhe sulm ndaj shtetit dhe demokracisë, por edhe Presidenti i Kosovës, Hashim Thaçi dhe kryeministri Isa Mustafa. Ndërkaq, lajmi për sulmin ndaj Parlamentit të Kosovës ka tërhequr vëmendjen edhe të mediave ndërkombëtare. /KosovaPress/
