Ambasadorja e Bashkimit Europian në Tiranë, Romana Vlahutin në një intervistë për radion gjermane, Deutschlandfunk ka theksuar se reforma në drejtësi do të zbulojë të gjitha lidhjet që mund të ekzistojnë midis gjyqtarëve dhe elementëve të krimit të organizuar. Ajo ka thënë se nuk janë të paktë gjyqtarët shqiptarë të cilët me 800 euro rrogë në muaj figurojnë në listën e njerëzve më të pasur në vend.
Vlahutin është vendosur në qendër të debateve në Shqipëri pasi u akuzua për mosdeklarim të pasurisë dhe procedim penal nga autoritet kroate. Reagimi i Vlahutin nuk ka vonuar. Ajo përmes një komunikate për mediat e shpërndarë nga zyra e shtypit e Delegacionit Europian në Tiranë tregon ka dorëzuar formularin e deklarimit sipas të gjithë parametrave.
“Mund të duket e çuditshme, por në fillim të viteve 1990, të gjithë gjyqtarët vinin nga koha e komunizmit. Më pas gjyqtarët e rinj janë trajnuar nga një kurs gjashtëmujor. Alternimi i këtyre elementëve ka bërë që korrupsioni të jetë një problem i madh i drejtësisë. Me reformën në drejtësi, gjyqtarët do kalojnë në një proces hetimi, për të zbuluar lidhjet e tyre me krimin e organizuar dhe për të mësuar për të ardhurat e tyre. Nuk është sekret, që disa gjyqtarë këtu janë ndër njerëzit më të pasur në vend- edhe pse marrin 800 euro në muaj”, tha ambasadorja.
