Policia kufitare e Gjirokastës ktheu sot drejt territorit grek 50 refugjatë, mes të cilëve 20 sirianë dhe 30 pakistanezë, që u kapën nga policia kufitare e Gjirokastrës një ditë më parë.
Burimet policore thanë se disa prej refugjatëve, mes të cilëve dhe fëmijë, janë paraqitur në gjendje të vështirë shëndetësore për shkak të qëndrimit prej disa ditësh në kushte të vështira në territorin grek, raporton Voa.
Refugjatët kanë marrë ndihmën e ekipeve të UNCHR-së që vepron në rajon dhe së shpejti pritet të jetë më aktive në Gjirokastër përmes një zyre të posaçme.
Policia shqiptare, raporton Voa, ka dyshime se grupe të mëdha refugjatësh fshihen në zonat pyjore afër Shqipërisë me synimin për të hyrë në territorin shqiptar. Këto zona janë të papërshkueshme nga rojet greke të kufirit dhe trafikantët shqiptarë shfrytëzojnë shtigje që dikur përdoreshin për kalimin e paligjshëm të refugjatëve shqiptarë.
Pak ditë më parë, një tjetër grup refugjatësh sirianë ishte bllokuar në segmentin rrrugor Tepelenë – Fier teksa transportohej me një makinë luksoze drejt kufirit të Malit të Zi. Grupet e refugjatëve sirianë që hyjnë nga Greqia dalin nga kampet greke të strehimit. Katër prej këtyre kampeve ndodhen në Veri të Greqisë afër kufirit me Shqipërinë.
