Ministra të qeverisë kroate morën pjesë në inaugurimin e një statuje të Miro Baresiç, i cili vrau një ambasador jugosllav në vitin 1971 dhe vdiq duke luftuar në luftën kroate për pavarësi 20 vjet më vonë.
Ministri i veteranëve të luftës Tomo Medved ishte një nga dy zyrtarë nga qeveria aktuale e përkohshme që mori pjesë në inaugurimin e statujës dy metra të lartë në fshatin bregdetar të Drage të dielën, duke e përshkruar Baresiçin si një patriot i cili luftoi për një Kroaci të pavarur.
“Miro Baresiç është një prej patriotëve më të mëdhenj kroat, punën dhe sakrificën e të cilit duhet ta respektojmë, ” tha Medved në ceremoni.
“Për vite me radhë, si një emigrant dhe në Luftën Atdhetare (term i përdorur për luftën e viteve 1990 në Kroaci) luftoi për një Kroaci të lirë dhe të pavarur dhe kurrë nuk hoqi dorë nga idetë e tij, edhe pse ndiente që ndaj kroatëve kryheshin sistematikish padrejtësi të ndryshme,” shtoi ai, shkruan kallzo.com.
Baresiç u dënua me burgim të përjetshëm nga autoritetet suedeze për vrasjen e ambasadorit jugosllav Vladimir Roloviç në Stokholm në vitin 1971.
Por kur një aeroplan i “Scandinavian Airlines” u rrëmbye nga militantë të armatosur kroatë në vitin 1972, ai u lirua nga burgu, së bashku me pesë burra të tjerë që morën pjesë në vrasje, për të përmbushur kërkesat e rrëmbyesve.
Atij iu dha leje të hynte në Paraguai, i cili në atë kohë njihej që shërbente si një vend fshehjeje për njerëz që kërkoheshin si mjeku nazist Joseph Mengele dhe diktatori ushtarak i rrëzuar i Nikaraguas Anastasio Somoza Debayle.
Në vitet 1977 dhe 1978, ai madje punoi me identitet të rremë si shpurë dhe përkthyes për ambasadorin e Paraguait në SHBA.
Autoritetet amerikane kërkuan ekstradimin e tij nga Paraguai në vitin 1979, nën dyshimin se ai ishte i përfshirë në zhvatje parash nga emigrantët kroate në SHBA.
Pasi akuzat kundër tij u rrëzuan, ai u ekstradua në Suedi në vitin 1980.
Dënimi i tij u reduktua në 18 vjet në vitin 1985 dhe ai doli nga burgu në vitin 1987 dhe u kthye në Paraguai, ku jetoi derisa u kthye në Kroaci në vitin 1991.
Ai u vra nga forcat rebele serbe në jug të Kroacisë më 31 korrik të atij viti.Një nga kushërinjtë e tij, Ante Baresiç, që ndërmori projektin për ngritjen e statujës, tha për gazetën e përditshme kroate Slobodna Dalmacija se i afërmi i tij ishte një luftëtar për liri.
“Unë besoj se Miro nuk ishte një terrorist dhe as ustash (fashist kroat i Luftës së Dytë Botërore), gjë që s’mund të ishte për shkak të datës së tij të lindjes (1950). Por ai ishte një nacionalist kroat dhe një luftëtar për liri për shtetin kroat . Dhe kushdo që mendon, nuk po thotë të vërtetën,” tha Baresiç.
Ai pohoi se Miro Baresiç nuk kishte qëllim ta vriste ambasadorin, por ta rrëmbente atë dhe ta shkëmbente me të burgosur kroatë. Ai këmbënguli se rrëmbimi shkoi keq, pasi Roloviç nxori një armë dhe u vra nga Baresiç.
Ministri tepër i diskutuar i kulturës Zlatko Hasanbegoviç gjithashtu mori pjesë në inaugurimin e statujës, së bashku me përfaqësues të lartë nga Partia Kroate e të Drejtave “Ante Starcevic”, që është pjesë e koalicionit qeverisës që po largohet.
Gjenerali i kohës së luftës Ante Gotovina ishte gjithashtu i pranishëm, si dhe Drazen Kelemineç, presidenti i diskutueshëm i Partisë Autoktone Kroate të të Drejtave, parti e ekstremit të djathtë, e cila u përpoq të parandalonte një përkujtimore antifashiste në qytetin kroat Srb të mërkurën e kaluar.
Një grup burrash me bluza që mbanin stemën e njësisë paraushtarake të Forcave Kroate të Mbrojtjes të viteve 1990 “Rafael Boban” gjithashtu thirrën sloganin fashist ‘Za dom spremni’ (‘Gati për Atdhe’) në inaugurimin e ditës së dielë.
