Ka ndërruar jetë sot në spital pas plagëve të marra në krimin e së dielës në Vlorë, personi i tretë, 53-vjeçari Krenar Runaj. Por ndërsa vrasja tashmë e trefishtë nuk ka ende asnjë autor, policia e Vlorës ka arrestuar sot një person që sipas saj, nuk tregon se kujt ia ka shitur makinën që dyshohet se është përdorur nga vrasësit.
Lidhur me ngjarjen e datës 24.07.2016, policia bën të ditur se nga kontrolli i territorit janë gjetur dhe sekuestruar në cilësinë e provës materiale 2 automjete plotësisht të djegura, të cilat dyshohen se janë përdorur nga autorët për realizimin e këtij akti kriminal.
Janë gjetur:
1- Mjeti foristradë tip “Jeep”, me targë AA210FS, i cili rezulton i vjedhur para 2 muajve në Fier.
2- Mjeti “Ford Focus”, i cili nga verifikimet e kryera dyshohet se është poseduar nga shtetasi Partizan Duraj nga Fieri.
Nga hetimet e kryera, Policia ka konstatuar se mjeti i dytë i përdorur nga ky shtetas, dyshohet se i është shitur disa personave të paidentifikuar nga ky i fundit, duke fshehur kështu identitetin e autorëve.
Policia ka arrestuar shtetasin Partizan Duraj, 42 vjeç, banues në fshatin Frakull, Fier, për veprën penale “Sigurimi i kushteve dhe i mjeteve për të kryer vrasje”.
Policia vazhdon hetimet për sqarimin dhe dokumentimin e plotë të ngjarjes, me qëllim vendosjen e autorëve përpara përgjegjësisë penale.
Vrasja ndodhi mbrëmjen e së dielës në një qendër bastesh në lagjen ‘Partizani’ pranë spitalit Vlorë. Të paktë një person ka hapur zjarr me kallashnikov në drejtim të qendrës së basteve, ku mbetën të vrarë në vend Ilir Deromema, 45 vjeç dhe Dhimitër Cani, 60 vjeç si dhe u plagos Krenar Runaj, 53 vjeç, i cili ndërroi jetë sot për shkak të plagëve të marra.
Vrasja dyshohet se u bë për hasmëri, pasi Deromemaj, pronar i një pike llotoje kishte vrarë në vitin 1998 shtetasin Lame Gockaj.
