Presidenti i Institutit Ndërkombëtar Republikan, Ambasadori Mark Green, i ka dërguar një letër Kryetarit të Partisë Demokratike Lulzim Basha, ku vlerëson rolin e opozitës në procesin e Reformës në Drejtësi.
“Sot unë dëshiroj t’ju uroj ju për drejtimin e partisë tuaj dhe të vendit tuaj, në votimin e kësaj reforme. Pavarësisht të gjitha pengesave, lidershipi që ju treguat në këtë rast në arritjen e një marrëveshje që i shërben të gjithë shqiptarëve meriton vlerësimet më të larta dhe i tregon popullit shqiptar se Partia Demokratike është e gatshme t’i qeverisë të gjithë qytetarët e vendit tuaj”, thuhet në letër.
Green, thotë se kjo reformë është përcaktuese në procesin e integrimit europian të vendit tuaj, një hap më afër përmbushjes së vizionit të Presidentit Xhorxh Bushit për një “Europë gjithpërfshirëse dhe të lirë”.
Kjo letër nga republikanët vjen në një kohë kur kryedemokrati Lulzim Basha po merr pjesë në konventën e demokratëve për zyrtarizimin e kandidates Hillary Clinton për presidente të SHBA.
