Gjykata e Apelit të Krimeve të Rënda ka lënë në fuqi masën “arrest me burg” për Iljaz Labin. zv/drejtorin e Burgjeve të akuzuar për korrupsion.
Gjykata e Krimeve të Rënda caktoi disa dite me pare masën e sigurisë “arrest me burg” për zv/drejtorin e Përgjithshëm të Burgjeve, Iljaz Labin, i akuzuar për korrupsion dhe abuzim me tenderët e ushqimeve. Gjithashtu, Gjykata e Krimeve të Rënda ka vendosur arrest me burg edhe për dy nga biznesnemënët e firmave që kryenin tenderët fiktivë, Elidjan Laskajn e “Dogel” dhe Shemsi Sinanin e “Kurti”. Ndërsa dy biznesmenët e tjerë, Ylber Kalaja i “Vllaznia” dhe Nexhmi Balla i “Nelsa” u lanë në arrest shtëpie nga gjykata.
Dy ditë pas arrestimit të zyrtarit dhe sipërmarrësve privatë, disa nga përgjimet e fshehta të realizuara gjatë hetimit të çështjes janë bërë publike. Në këto përgjime, sipas akuzës së Prokurorisë, zv.drejtori i Përgjithshëm i Burgjeve mban kontakte rregullisht me biznesmenët që aplikonin për tenderë dhe kërkon prej tyre shuma deri në 2 milionë lekë të rinj. Në kërkesën e Prokurorisë drejtuar Gjykatës për caktimin e masave të sigurisë ndaj pesë të arrestuarve përmenden edhe episodet e përgjimeve mes zv.drejtorit të Përgjithshëm të Burgjeve dhe katër tregtarëve.
Sipas kërkesës së Prokurorisë, në datën 25 maj 2016, Iljaz Labi ka komunikuar me Shemsi Sinanin, i cili është arrestuar në aksionin e tri ditëve më parë. Nëndrejtori i Burgjeve ngulmon në bisedë se pse tregtari nuk e takon, duke i vënë edhe kushtin që, nëse nuk vinte atë ditë, do të ishte më mirë mos të vinte fare. Më 3 qershor 2016, shtetasi Ylber Kalaja, edhe ky person i arrestuar, është përgjuar teksa i thotë Shemsi Sinanit që të shkojë ta takojë “atë dyshin” se e kishte çmendur me mesazhe. Mesa duket, ngulmimi për t’u takuar kishte lidhje me kërkesën e zv.drejtorit të Burgjeve për të marrë paratë nga tregtari. Për këtë arsye, në përgjim duket se Shemsi Sinani e pyet Ylber Kalanë sa duhet t’i japë, 1 apo 2.
Në përgjim, Kalaja i thotë Sinanit që t’i japë 2 “se nuk dihet si merr puna, pasi u duhet të mbajnë ekuilibër”. Por Sinani i thotë, ndër të tjera, se nuk u ngelet gjë, duke pretenduar se ishin shumë 20 milionë lekë të vjetër. Pas diskutimit në lidhje me shumën që do të jepej për zyrtarin e Burgjeve, Ylber Kalaja i sqaron Sinanit se kishin rënë dakord, duke lënë të kuptohet se nuk ishte hera e parë që fitonin tenderë në këtë mënyrë. Sipas Prokurorisë së Krimeve të Rënda, në datat 4 dhe 6 qershor janë kryer dhe dy përgjime të tjera, ku katër administratorët e firmave bien dakord për të paguar ryshfetin prej 20 milionë lekësh te nëndrejtori i Burgjeve, Iljaz labi.
Sipas dialogëve të regjistruara më 6 qershor, Ylber Kalaja bisedon me Shemsi Sinanin që do të takohen për kafe dhe të marrë me vete vulat e dy subjekteve “Starti” dhe “Kurti”, duke e mbyllur punën. Në një bisedë tjetër midis Elidian Laskës dhe Shemsi Sinanit, ky i fundit e pyet se kishte që javën e kaluar për t’i dhënë lekët, por nuk ishte bërë i gjallë. Më pas, ata të dy diskutojnë dhe flasin për faktin se “fondet e tenderit të shkurtit kanë kaluar”. “O Ledion, o Ledion, të lutem po bën 1 vit, do më bësh lekët apo jo, dy llafe ndajnë”, i ka thënë më pas Shemsi Sinani Elidion Laskës. Dyshohet se Sinani ka qenë personi që merrte paratë për llogari të zv.drejtorit të Përgjithshëm të Burgjeve.
