Me kërkesë të Prokurorisë së Përgjithshme, Gjykata e Lartë vendosi sekuestro preventivë mbi llogaritë bankare, në shumën 50 mijë euro, në emër të Odhise Andrea, bashkëshort i gjyqtares së Gjykatës së Lartë, Majlinda Andrea.
Dy bashkëshortët dyshohen se kanë kryer veprën penale të “Korrupsionit pasiv të gjyqtareve…’. Nga hetimi i Prokurorisë janë krijuar dyshime të arsyeshme se gjyqtarja Andrea ka marrë, nëpërmjet bashkëshortit të saj, shumën prej 50 mijë euro, nga disa persona, të cilët ishin palë në një proces gjyqësor civil në Gjykatën e Lartë.
Prokuroria e Përgjithshme kërkoi nga Gjykata e Lartë vendosjen e sekuestros preventivë mbi disa llogari bankare të Odhise Andreas në vlere totale 50 mijë euro (shumë e njëjtë me atë që dyshohet se është marrë në formëkorruptive). Llogaritë bankare të bllokuara gjenden në dy banka të nivelit të dytë. Kërkesa e Prokurorisë së Përgjithshme u pranua nga ana e Gjykatës së Lartë mesditen e sotme.
