Kryetari i Shoqatës së Avokatëve Penalistë, Sajmir Vishaj, i kërkon ambasadorit amerikan në Tiranë, Donald Lu të publikojë emrat e prokurorëve dhe gjyqtarëve, të cilëve u është refuzuar pajisja me vizë për në SHBA.
“Unë mendoj që duhet një amnisti për ata gjyqtarë apo prokurorë që minimalisht s’kanë marrë viza në ambasadën e SHBA në Tiranë, që para se të kalojnë vetingun, të japin dorëheqjen nga sistemi i drejtësisë, qofshin këta të gjykatave apo prokurorive të rretheve apo Krimet e Rënda. Ka ardhur koha që ambasada e SHBA-vë në Tiranë, siç e falënderuam për reformën në drejtësi, të japë emrat e tyre”, shkruan avokat Sajmir Vishaj në një postim në “Facebook”.
Miratimi me konsensus i ndryshimeve kushtetuese në seancën e së enjtes i hap udhë përzgjedhjes nga politika të 31 zyrtarëve të lartë të drejtësisë. Përzgjedhja do të nisë me 21 anëtarët e komisionit të vetingut, që do të përbëhet nga Komisioni i Pavarur i Kualifikimit, Kolegji i Apelimit dhe dy komisionerë publikë.
Kandidatët dorëzojnë aplikimin te presidenti, që ka 45 ditë për të nxjerrë listën e atyre që kualifikohen ose jo, në të kundërt kjo kompetencë i kalon Avokatit të Popullit. Është më tej operacioni ndërkombëtar i monitorimit, që vlerëson kandidatët dhe i kalon 3 lista Kuvendit. Në të gjelbrën kandidatët nuk plotësojë kriteret formale, në të bardhën janë kandidatët e kualifikuar, në të zezën janë mbetësit. Listat filtrohen nga komisioni ad hoc me 6 anëtarë ë Kuvendit, tre nga opozita tre nga shumica. Më pas një komision tjetër me 12 anëtarë zgjedh në mënyrë elektronike 12 kandidatët për Komisionin e Pavarur të Kualifikimit dhe komisionerët publikë, ndërsa një komision i tretë zgjedh në të njëjtën mënyrë, 7 anëtarët e Kolegjit të Apelimit.
