“Gjobat ndaj biznesit janë rritur frikshëm, qeveria nuk ka ndër mend të rrisë as rrogat e pensionet, që janë akoma në nivelet e 4 viteve të shkuara. Ky është faktori kryesor i bllokimit të ekonomisë. Niveli i papunësisë është rritur në shifra të frikshme. Shpresa për punë është vrarë, për ekonomi është vrarë dhe qeveria hesht”.
Kështu është shprehur ish -ministri i Financave Ridvan Bode ku ka akuzuar qeverinë se ka rritur nivelin e papunësisë në vend në krahasim me 4 vitet e shkuara, kur në pushtet ishin demokratët. Ai tha se ekonomia shqiptare është bllokuar për shkak të reformave dhe politikave të papërgjegjshme të qeverisë.
Më tej ai shtoi se qeveria shfrytëzon rastet për të treguar ngopjen e saj me lugën bosh. “Nuk ka trend të qëndrueshëm të ekonomisë shqiptare. Bujqësia dhe industritë nxjerrëse e përpunuese, vijojnë të bien nga 3 mujori në 3 mujor, bien nga viti në vit dhe qeveria hesht. Këto sektorë kanë taksa vrasëse. 500 mln dollarë taksa të reja mungojnë në buxhet. Fondet për mbështetjen nga më të ulëtat”, shtoi ai.
Pas fjalës së Bodes, ka reaguar ministri i Financave, Arben Ahmetaj, i cili kundërshtoi me shifra ish-paraardhësin e tij. “Tashmë, 621 mijë shqiptarë paguajnë më pak taksa. Qeveria jonë ka ulur çmimin e energjisë dhe ilaçeve. Zeruam taksat për biznesin e vogël. Në qeverinë tonë, 173 mijë të punësuar të rinj. Kjo është diferenca me qeverinë tuja. Rritja ekonomike sot është 2.96%, kur e morëm ne ishte 0.8%, gati 4 herë më e madhe nga ç’ishte”, iu drejtua Ahmetaj, Bodes. Ahmetaj vijoi se, “kreditë e këqija janë ulur. Më në fund ekonomia shqiptare ka filluar të dalë nga gremina me një trend të konsoliduar. Konsumi ka tre 3-mujore resht që rritet. Rritja ekonomike sot është e konsoliduar. Është ulur pagesa për ndihmën ekonomike, por për shkak të transparencës”.
