Kryeministri Edi Rama është shprehur optimist për votimin të enjten të reformës në drejtësi.
“Reforma o do votohet o do votohet! Historia nuk ndalet dot me manovra në xunkth, thirrja e saj shemb çdo mur shurdhërie. Ky vend është i popullit dhe ky popull i përket Europës”, shkruan Rama.
24 orë para votimit në Kuvend të reformës në drejtësi, palët po vijojnë përpjekjet për arritjen e kompromisit për të vetmen çështje të padakortësuar deri tani që lidhet me rolin që do i caktohet në Kushtetutë Operacionit Ndërkombëtar të Monitorimit, gjatë procesit të seleksionimit të kandidatëve për vetingun dhe të anëtarëve jogjyqtarë të reformës në drejtësi.
Një ditë më parë, kryetari i Kuvendit, Ilir Meta, u shpreh i vendosur për miratimin e draftit të ndryshimeve kushtetuese. “Kjo seancë plenare,-tha ai, nuk do të përmbyllet pa miratimin e Kushtetutës së re”. Ndërkohë edhe kreu i PD ka deklaruar se opozita do ta votojë parimisht draftin.
