Në këto ditë të nxehta vere, uji është shumë i rëndësishëm për të shuar etjen dhe qenë të hidratuar. Por, nuk duhet të përdorni asnjëherë të njëjtën shishe për të mbushur ujë, pasi është e dëmshme për shëndetin.
Sipas ekspertëve, përthyerjet e vogla që krijohen në shishet plastike janë një terren ku mund të ushqehen dhe rriten një gamë e gjerë mikrobesh të rrezikshme, si norovirus.
Meqë pjesa më e madhe e jona thjesht e shpëlajmë shishen, në vend që ta lajmë siç duhet, këto baktere fillojnë të shumohen.
Gjatë një studimi të publikuar tek Revista Kanadeze e Shëndetit Publik u morën kampionet e 76 shisheve të ujit të përdorura nga disa studentë. Gati 2/3 e këtyre kampioneve kishin nivele bakteriale që i kalonin udhëzimet e konsumimit të ujit. Këto baktere ishin shumuar në shishe pasi kishin qëndruar në një temperaturë dhome për një periudhë të gjatë.
Një tjetër studim, i kryer nga një kanal televiziv amerikan, “KLTV news”, ekzaminoi shishet e ujit që ishin ripërdorur për vetëm një javë, duke marrë kampione nga gryka e shishes.
Dr. Richard Wallace, nga Universiteti i Qendrës Mjekësore në Teksas, pas analizave u tha gazetarëve që uji kishte aq shumë baktere sa njerëzit mund të sëmureshin më shumë se një helmim nga ushqimi.
Sipas dr. Wallace, ata mund të shkaktojnë të përziera, të vjella dhe diarre.
Po nëse i keni larë?
Larja me ilaç enësh mund t’i mbajë larg bakteret për një kohë të shkurtër, por, nëse shishet janë të vështira për t’u larë siç duhet, do të fillojnë të formohen bakteret,
Gjithashtu, përdorimi dhe larja e shpeshtë e shisheve mund të shkaktojë dobësim të plastikes, sidomos nëse lahen me ujë shumë të nxehtë.
Sipas dr. Scott Belcher, profesor i farmakologjisë tek Universiteti Cincinnati, në Ohajo, nxehtësia mund të rrisë shanset e shkëputjes së kimikateve nga plastika dhe përhapjes së tyre në ujë.
