Eurodeputeti Knut Fleckenstein, deklaroi sot në Tiranë se të enjten, ne presim që Kuvendi i Shqipërisë të votojë reformën në drejtësi.
Kur them “NE”, tha eurodeputeti, nuk e kam fjalën vetëm për një parti në Parlamentin Europian, por për gjithë PE-në. Shpresojmë që do të ketë një votë “PRO” reformës në drejtësi.
Ka ardhur koha për të vërtetën dhe unë dëshiroj të shoh se kush është “PRO” reformës dhe kush është “KUNDER” saj, u shpreh zyrtari europian, në përfundim të tre takimeve te sotme në TIranë, me kryeministrin Edi Rama, me kryetarin e Kuvendit, Ilir Meta dhe me kryetarin e PD-së, Lulzim Basha.
Ketu nuk bëhet fjalë thjesht për një ndryshim ligji, tha eurodeputeti, pasi për Shqipërinë do të ishte shumë e rëndësishme nëse zbatimi i kësaj reforme bëhet siç duhet do të ketë një ndryshim thelbësor per vendin dhe unë vërtet shpresoj që ky ndryshim të fillojë të enjten, nenvizoi Fleckenstein.
Në rast se ka mbetur një gjë e fare e vogël, për të cilën politikanët nuk mund të bien dakord atëhere ndoshta duhen pyetur qytetarët, shtoi ai, duke lënë të kuptohet mundësinë e mbajtjes së një referendumi.
Në konferencën për shtyp, nga selia e Delegacionit të Bashkimit Europian në Tiranë, zyrtari i PE-së tha se gjatë fundjavës, në bashkëpunim me eurodeputetin Eduard Kukan, kemi nxjerrë një deklaratë, ku kemi theksuar se dëshirojmë që partitë politike në vend të gjejnë një kompromis, në veçanti një kompromis të minutës së fundit, pasi ka mbetur vetëm ”një çështje e vogël”.
“Po ashtu kemi theksuar se sa e rëndësishme është pjesëmarrja e Operacionit Ndërkombëtar Monitorues, pra e atyre që do ta bëjnë këtë proces. Dhe më lejoni të bëj një koment personal, se në Bruksel kjo ka qënë dhe arësyeja pse është rënë dakord me propozimin që bëri PD, sa i përket vlerësimit të gjyqtarëve apo prokurorëve, me mekanizmin, 6+6.
Në deklaratën e tij, zyrtari europian u shpreh në mbështetje të përpjekjes për dialog të kryeparlamentarit Ilir Meta.
“Ne mbështesim tërësisht dhe plotësisht kryetarin e Kuvendit në përpjekjet e veta të për të gjetur një zgjidhje në sajë të propozimeve që janë bërë, gjithnjë mbi bazën e propozimit hibrid”, tha eurodeputeti.
Po ashtu Fleckenstein mbështeti diskutimet mbi “propozimin hibrid” për reformën në drejtësi, i ofruar nga ndihmëssekretarja amerikane e Shtetit, Viktoria Nuland, gjatë vizitës së fundit në Tiranë.
