Ish -zv.drejtori i Përgjithshëm i Burgjeve, Iljaz Labi, i arrestuar pak ditë më parë, akuzohet se ka marrë ryshfet në të paktën dy raste, të cilat janë dokumentuar gjatë hetimit.
Ai tashmë është vënë edhe nën një akuzë të re, pasi në banesën e tij në kryeqytet gjatë arrestimit për korrupsion është gjetur edhe një armë zjarri tip pistoletë, pa leje. Lajmi është bërë me dije nga burime të konfirmuara, të cilat thanë se nëndrejtori i Burgjeve nuk kishte leje për mbajtjen e armës që u gjet në banesën e tij. Në një rast zyrtari i lartë i Burgjeve ka marrë 2 milionë lekë të rinj për fituesin e një tenderi dhe në rastin tjetër ka marrë edhe 200 mijë lekë të rinj pas dhënies së tenderit.
Prokuroria për Krime të Rënda ka arritur të provojë se administratorët e kompanive kanë bashkëpunuar me njëri¬tjetrin, me qëllim marrjen në mënyrë fiktive të prokurimit me objekt “Blerje bulmet dhe vezë”, e cila ka datë lidhje kontrate 31.05.2016 dhe me vlerë totale të kontratës 22.647.936.
Për realizimin e qëllimit, katër personat e dyshuar kanë biseduar për të paguar në mënyrë solidare të paktën një shumë prej 2 milionë lekësh të rinj te zv.drejtori i Përgjithshëm i Burgjeve, Iljaz Labi, me qëllim që ky i fundit t’u krijonte lehtësitë e nevojshme gjatë procedurës së prokurimit. Për të realizuar këtë qëllim, sipas Prokurorisë, Iljaz Labi ka mbajtur kontakte dhe ka zhvilluar takime të vazhdueshme me personat nën hetim, Ylber Kalaja dhe Shemsi Sinani, duke kërkuar prej tyre përfitim për procedurën e prokurimit të datës 31.05.2016, edhe pse kontraktuesi është subjekti “Nelsa”, me administrator shtetasin Nexhmi Balla.
Nga ana tjetër, në një rast tjetër ryshfeti, nëndrejtori i Përgjithshëm i Burgjeve akuzohet nga Prokuroria se ka marrë 200 mijë lekë të rinj ryshfet.
Këtë shumë Iljaz Labi, sipas Prokurorisë, e ka marrë pasi në cilësinë e kryetarit të komisionit ka ushtruar një kontroll në burgje për të parë cilësinë e ushqimit, me të cilin firma fituese po furnizonte institucionet. Me argumentin se kishte gjetur shkelje në zërat e tenderit dhe te cilësia e tyre, nëndrejtori i Burgjeve mësohet se ka marrë 200 mijë lekë të rinj për të mos vendosur penalitete ndaj kompanisë fituese.
Prokuroria ka hetuar gjithsej gjashtë procedura tenderësh të zhvilluara në Drejtorinë e Burgjeve, ku janë gjetur abuzime me shpalljen e kompanive fituese kundrejt marrjes së ryshfetit. Tri ditë më parë, Gjykata e Krimeve të Rënda la në burg të arrestuarit Iljaz Labi, ish¬zyrtar i Burgjeve dhe biznesmenët Elidjan Laskaj, Ylber Kalaja dhe Shemsi Sinani, ndërsa në arrest shtëpie u la Nexhmi Balla, i cili bashkëpunoi me hetimin.
